السبت، 18 يونيو، 2011

يومها انا كنت باصصلك بسرح
خايف اقلك كنت متنح
صاحبى يقلى فيه ايه مالك
وانا كنت انكر وافضل سارح
بس انا فاكره كا يوم الامس
ان القلب بتاعى بيفرح
اصلى دى اول مره بيفرح
واهو دلوقتى اعد يذكر يوم الامس
مره بضحكه ومره بفرح
اعمل ايه طول ما انا وياكى
احمد ربى
انه بيبعد عنى الجرح
يومها وحشنى نور الشمس
كل فكرى يعيد الامس
كانت شجره و اعده فى ضله
وكانو شفايفك بتهمس همس
كنتى بتزرعى قلبى خضار
...و تخربشى وتبدأى حرث
جيت اليوم بطوى الضل وبطوى الشمس
على يوم تانى اسمع فيه كلام الهمس

الجمعة، 17 يونيو، 2011

راديو التحرير ( اذاعه الشرح الابسط)


اول مره اذاعه على النت كان يوم
1-2-2011
*أنشأ فى ميدان التحرير 1 فبراير । من خلال مجموعة من الشباب ، وكان الهدف هو نقل صوت الميدان والأحداث الجارية به . وذلك بعيداً عن تحيز أراء بعض القنوات والإذاعات الأجنبية . ولقد تم القيام بتسجيل لقاءات مع الثوار فى الميدان . وذلك بجميع أطيافهم وبثها ساعة بساعة ... وأيضاً إذاعة جميع البيانات الخارجة من الميدان حتى يوم التنحى 11 فبراير ... وبعد تاريخ التنحى بدأنا فى عمل خطة عمل مستمرة للإذاعة من خلال الموقع الإلكترونى لها . وتتضمن الآتى
1-رصد ومتابعة الأحداث الثقافية والفنية والسياسية فى مصر .
2-متابعة الإئتلافات والحركات الثقافية والفنية والسياسية الخارجة من قلب المجتمع المصرى وتسليط الضوء عليها .
3- تسليط الضوء على الفرق الغنائية المستقلة فى مصر والعالم العربى من مطربى "Under ground" .
4- بث موسيقى هادفة راقية بالإذاعة ترقى بذوق المستمع والبعد عن الموسيقى المستهلكة .
5- تسجيل برامج من نوع جديد على الإذاعات المصرية ....ا

راديو التحرير
إذاعة الشرح الابسط
تقدر تسمعها من خلال اللينك ده
http://www।elta7rer.com/
مستنى ارائكم على صفحتى على الفيس



الثلاثاء، 22 يونيو، 2010

للمسانده والمشاركه

يا جماعه دى لينكات جروب خالد سعيد حاولو تساعدونا فى نشرها
وبالذات اللينك التانى للوقفه الصامته وشروطها
وده لينك الوقفه يا جماعه

السبت، 12 يونيو، 2010

اللون رمادى والموقف مايع والحل وسط


كل شويه اغير صوره البروفايل عشان اساند قضيه مهمه وبعدين يا جماعه ارسو على حل فى بلد القضايا المتناثره دى
صوره العلم الاسرائيلى تحت الاقدام ولا مش عايز قانون طوارئ ولا نسر الجمهوريه وهو مسلوخ وطالع تلاته ..............امه ولا صوره خالد سعيد شهيد الطوارئ ولا ولا ولا
مباريات كاس العالم بعد ما كانو مش عارفين يجيبهوا فجاه يدفعو 120 مليون دولار عشان يبثو 20 مباراه قمه التخلف فى التعامل مع الشعب الجعان واللى 120 مليون دولار كانت هاتغير للاحسن لو اتصرفت على البلد المتهالكه دى
هو فى مثل كنت بسمعه زمان ينطبق على اللى حصل ده ( الهى الكلب بحته عضمه) هوده اللى حصل بالظبط عايزين كاس عالم هانجيب كاس عالم بس مالكوش دعوه بسياسه البلد ولا ليكو دعوه بضرايبكو اللى بتدفعوها
اصلى لو المواطن مش هايضيع ساعتين قصاد التليفزيون هايوجعلهم دماغهم ويقلهم فين القصاص لخالد السعيد اللى قانون الطوارئ ادا الحق لاتنين من زباله الحكم انهم يضربو شاب محترم لا وكمان المواطن يناقشهم فى تزوير انتخابات مجلس الشورى ومش بعيد يقلهم فين ال50 جنيه بتاعت الترشيح طيب بذمتك يرضيك توجع دماغ حكومتك
وطبعا حكومتنا اصلا عندها صداع ومش ناقصه وجع دماغ
احتار دليلى فى المجتمع المتراخى المتراجع كل حلوله وسط وكل الوانه رمادى وكل موقف اكثر ميوعه
من اللى قبله

لك الله يا مصر ولكم النقمه يا عصبه الحكم ولكم ال.......يا مصريين



الجمعة، 21 مايو، 2010

ذهول واذبهلال






حصل وفى يوم خلصت شغلى بدرى وقلت اجيب الجرنان واعد فى النادى اذاكر واقرى الجرنان تحت الشجره المضلله الحلوه واخدلى فنجان قهوه واروق القنانى خلصت المزاكره وفتحت الجرنال وفجأه فتحات وشى كلها فتحت واتسعت على وسعها وحسيت ان فى نقط بتنزل من وشى مش عارف من انه فتحه بالظبط و برضه مسام جسمى كلها بتجيب ميه
قال خير اللم اجعله خير صحفى كاتب ان فى شارع فى محافظه البحر الاحمر حكومتنا الغفيره والنظيفه سمته ( تل ابيب ) بتقولو ايه علو صوتكو تانى ( تل ابييب )طيب الصحفى ده انا مصدقتوش واتاكدت بنفسى لا المصيبه ان فى ناس مصريين ساكنين فى الشارع مكتوب عنوانهم باسم الشارع طبعا عملت فيها المفتش كرومبو وتوقعت حسن النيه فى حكومتنا وفى محافظه البحر الاحمر واعدت افكر بس بعد طول تفكير برضه قلت مش فاهم عادى جدا الغباء مش عيب بس العيب اننا منعترفش اننا اغبيه ولاد ...........!!
مش فاهم بقى هل ده مثلا من باب التطبيع مع عدونا اللى فى يوم من الايام كانت محتله محافظه البحر الاحمر واللى استشهد مننا شباب عشان نعرف نرجع الشارع اللى سموه على اسم عاصمه الصهاينه
ولا ده تسليم من حكومتنا -المصون والجوهره المكنون واللى هتودينا مطرح ما بيحطو المجنون- بان سينا فى اسرائيل واتفاقيه كامب ديفيد كانت فض مجالس وحكومتنا بتقولهم انتو اهو لسه موجودين فيها وحطو فى ..... بطيخه صيفى! طيب هنفترض حسن نيه فى حكومتنا وهنلغى الافتراضات المتشائمه اللى فاتو والمسامح كريم والشعب عب.. ااقصد طيب
طيب على اساس ايه خلصت من عندنا الاسامى وضاقت الدنيا بينا
اسامى مفكرين وادباء ومخترعين وعباقره وموسقيين طيب بلاش اسامى ناس ولا اسامى شهداء اصلا ماتو عشان يحررو الشارع اللى اتسمى فى الاخر على اسم عاصمه الدوله اللى قتلتهم
يسموه باسم موقعه حربيه او حتى اسم 6 اكتوبر اهو اسم يرفع راسنا قصاد الصهاينه اللى داخلين وخارجين من سينا ولا هما مش عايزين يزعلو المواطن الاسرائيلى كده او يجرحوه ويعملولو واوا
واحنا بقى حكومه بوس الواوا
بعد حاله الذهول والاذبهلال والخروج من التفكير فى الكابوس ورجوع شكلى على سابق عهده
دورت عن الموضوع وعرفت
كشفت دعوى قضائية تقدم بها سكان احد الشوارع بمحافظة البحر الأحمر المصرية عن وجود شارع بالمحافظة بحمل اسم تل أبيب عاصمة الكيان الصهيوني .

كان المحامي نبيه الوحش قد تقدم بدعوي ضد كل من محافظ البحر الأحمر ورئيس المجلس المحلي للمحافظة ورئيس مدينة رأس غارب طالبهم بإلغاء اسم "تل أبيب" من علي أحد الشوارع برأس غارب بسبب تضرر الأهالي من إطلاق هذا الاسم الذي يحمل اسم عاصمة الكيان الصهيوني علي الشارع الذي يقيمون به.
وجاء في الدعوي أن أهالي الشارع تقدموا بطلبات إلي رئيس المدينة طالبوا بتغيير الاسم لأنه يذكرهم بما ارتكبه "الإسرائيليون" من جرائم حرب ضد المصريين في حربي 56 و67 وعندما يأسوا قاموا بنزع اللافتة التي عليها اسم الشارع ومازالت فواتير المياه والغاز والكهرباء تأتي لعدد من السكان مدونا عليها شارع "تل أبيب"

وقال الوحش في دعواه، التي كشف عنها يوم12 / 4 /2010 لـ"النهار": إن الآلاف من أهالى مدينة رأس غارب سبق وتقدموا بالعديد من الطلبات إلى رئيس المدينة مطالبين بتغيير اسم هذا الشارع، لأنه يؤذى مشاعرهم ويذكرهم بمجازر الكيان الصهيونى اليومية في فلسطين وبشهداء حربى 56 و67، وأضاف أنه عندما يأس المواطنون من الاستجابة لمطالبهم قاموا بنزع اللافتة بأيديهم حتى لا تكون خزيًا وعارًا، ولكنهم فوجئوا بفواتير المياه والكهرباء وايصالات الغاز صادرة باسم شارع "تل أبيب"، وكذلك بطاقات الرقم القومى.

وطالب الوحش بتغيير اسم الشارع من شارع "تل أبيب" إلى شارع "6 أكتوبر"، وإخطار جميع الجهات بهذه القرارات بدءًا من مصلحة الأحوال المدنية ومرفق المياه وشركة الكهرباء والغاز وجميع المصالح الحكومية



طبعا مفيش قدام الشعب غير انه يكسر اليافطه والحمد لله انهم معتقلوش اللى كسرها بتهمه الاضرار بالاموال العامه
وابقى سلملى على الجهات المعنيه

محلاها عيشه الحريه

وانا بفكر فى الواقع المؤلم والمقلق لاقيت حاجه لونها اسود فى رمادى قصادى والناس بتخاف منها وبتتشائم بطريقه مبالغ فيها لحد ما فى افتاء -انت عارف الفتايين بيشجعو واحنا معاهم- ان قتله بيزود حسناتك المهم طبعا كنت بفكر عادى زى اى حد انكتب عاليه يعيش يشرب ويتنفس هواها الملوث وهى الفكره الواقعيه عن بكره او بالاصح التشاؤميه كمرض مزمن المهم بمجرد نظرتى للغراب وطبعا كانت نظره حسد كانت هاتخليه هو يتشائم منى سرحت وحطيت نفسى مكانه وقلت ياسلام لو انا زيه ابقى فى المهندسين كده واروح على المعادى واخد البريك بتاعى فى الجزيره ولا فوق البرج ومش هاعد الف عشان اركن جنحاتى صف تانى طبعا هاخد اللى بيتمناه كل مصرى مش هدفع ضرايب من اللى عمالين بيالفوها كل كام يوم لا ولو شفت واحده عجبتنى مش هابقى محتاج الون ريشى عشان اعجبها ولا اجيبلها عش تلت اقفاص بصاله كده الحياه حره واصحى الصبح اجيب رزقى ورزق عيالى واجى اخر النهار اشوف عشى من غير قرار ازاله ولا ضريبه عقاريه يعنى من الاخر محلاها عيشه الحريه
لحظات زى دى بجد بتخلينى انسى همومى وفوق السحاب خايف افضل اهرب من الواقع المؤلم بالخيال!!!


بره الشبابيك


بعد ابتعادى عن التدوين فتره اراها قصيره عبرت بين ليله وضحاها فجاءه اجد قلمى يذكرنى بنفسه بانه موجود وانه لطالما وجدت فيه ملاذى وتنفيسى عن الضغوط المحيطه بى اجد نفسى اضغط بالقلم مره اخرى على اوراقى واقفذ بالخارج (بره الشبابيك)ـ